Mojkovčanin uskočio u hladnu Taru i mladog sugrađanina spasio smrti

Mišnić je tog dana bio blizu svog doma kada je vidio da je mladić skočio sa mosta na Tari.

“Trčao sam nasipom nekih 400 metara, jer sam vidio da voda već nosi tijelo. U jednom momentu nisam znao kuda da priđem a već sam vidio da će voda da ga odnese niže niz rijeku gdje ga više ne bih mogao stići. Morao sam da uđem kroz gusto rastinje i da ga izvučem“, kazao je Mišnić u razgovoru za Antenu M.

Hrabri Mojkovčanin ni sekunde nije oklijevao, već je ugrabio momenat da uskoči u Taru i sugrađanina izvuče na sigurno.

“Izvukao sam ga na nekih 300 metara od samog mjesta gdje je skočio, on je bio u polusvjesnom stanju, ja sam ga izvukao na obalu i tu su mi prišli drugi ljudi u pomoć, na magistrali su nas već čekala kola hitne pomoći. Momak je bio vidno ugruvan i sa povredama, koljena i nogu ali sada je u stabilnom stanju“, poručuje Mišnić.

Primjeri poput hrabrog djela Aleksandra Mišnića iz Mojkovca podsjećaju nas na to koliko su važni solidarnost, humanost i spremnost da se pomogne drugima.