Bivši radnici Rudnika boksita blokirali odvoz rude: Oteli su nam plate, mladost i život

Bivši radnici tvrde da do daljeg neće dozvoliti otpremu rude boksita sa separacije u naselju Gračanica u Nikšiću. 

“Šaljemo napomenu sadašnjem premijeru Dritanu Abazoviću koji nam je obećao da ćemo kada se proda upravna zgrada Boksita biti isplaćeni. On je nas zaboravio, ali nećemo mi njega i zamolili bismo ga da nam uplati pare prije nego što odleti kod Zelenskog u Ukrajinu “, kazao je bivši radnik Danilo Korać.

Bivša radnica Boksita Jelica Kovačević kazala je da već dvadeset godina kako su počeli iz jame da štrajkuju.

“Tražimo svoja teško stečena prava. Mi smo ovdje ostali većinom i bez stana i bez kredita za stambenu nadoknadu. Oteli su nam plac, oteli su nam plate, oteli su nam život, oteli su nam mladost. Oteli su nam sve što je bilo”, kazala je Kovačević.

Ona ističe da je to urađeno za nečiije dobro, koji imaju stanove, plate, ko se bahati.

“To se više ne može trpjeti. Mi smo ovdje. Ovdje su i naši preci radili, ovo su oni zaradili. Naši preci su ovo i osnovali da bi mi živjeli, njihovi nasljednici. Na kraju je ispalo da mi molimo za mrvice sa njihovog bogatoga stola. To je sramno”, kazala je Kovačević.