Sjednica prekinuta, Abazović se unosio u lice Čarapiću?

Do incidenta je došlo kada je u salu ušao lider GP URA Dritan Abazović i prošao pored klupa gdje sjede poslanici PES-a.

Nakon toga se čula poslanica PES-a Branka Marković koja je više puta ponovila: “Alo, ostavi ga”.

Predsjedavajuća Zdenka Popović je dala pauzu.

Vijesti pišu da je prethodno šef poslaničkog kluba PES-a Vasilije Čarapić rekao da je Abazović pozvao milijardera iz Ujedinjenih Arapskih Emirata (UAE) i vlasnika kompanije „Eagle Hills“ Mohameda Alabara u Crnu Goru, i da je detaljna studija lokacije, koja se odnosu na ulcinjsku Veliku Plažu, gdje Alabar namjerava da gradi rizort, „data da se radi za vrijeme 43. Vlade“, na čijem je čelu bio lider GP URA.

Abazović tada nije bio u plenarnoj sali, ali je došao nedugo nakon toga i verbalno se sukobio s poslanicima PES-a.

Više poslanika „Vijestima“ je reklo da se predsjednik GP URA navodno unosio u lice Čarapiću.