Haland oborio dva rekorda Premijer lige: Prvi do devet golova i dva het trika

Prije njega Serhio Aguero u Sitiju i Mik Kuin u Njukaslu su bili na prvom mjestu sa osam golova u prvih pet mečeva.

Haland je do sada na prvom meču protiv Vest Hema dao dva gola, postigao je jedan gol protiv Njukasla, a onda su uslijedila dva het trika, jedan protiv Kristal Palasa i drugi protiv Notingem Foresta sinoć.

Jedina ekipa protiv koje se nije upisao u strijelce je Bornmut, ali je na toj utakmici bio asistent.

Osim ovog rekorda postigao je još jedan, postao je igrač koji je najbrže postigao dva het trika u Premijer ligi.

Rekorder je do sada bio Demba Ba kojem je trebala 21 utakmica.

Koliko je impresivan njegov učinak najbolje se ogleda u tome da ima već jednak broj het trikova kao Sadio Mane, Eden Azar i Geret Bejl.

Norveški napadač je posebno „kupio“ navijače Sitija jer je nakon svega ovoga kazao da se samo trudi da sluša trenera Pepa Gvardiolu, i da duguje dosta i saigračima.

„Trudim se slušati Pepa koliko god mogu i nastojim dostojno igrati sa fantastičnim saigračima. Bez njih ne bih mogao davati golove. Sve što postižem plod je hemije sa saigračima, igranja s njima i slušanja Pepa.“